JOANNIS STEPHANI DE THERMIS CENETENSIBUS AD MICHAELEM ANGELUM ROTAM

Est locus ignotus fama, qui dicitur Aslas, (1) Clivus Acedicolis (2) Nymphis gratissimus, aeque Herbarum, Salicumque frequens, et dives Olivi Urbem Palladiam (3) Vallemque interjacet Arctam (4), Arduus, et patulis spectatus Collibus Aslas: Deliciae Pastorum Aslas, atque unica cura. Hic pascebat oves olim inter amoena vireta Thirenus placido Liciae succensus amore, Candida cui Lycia ardentes aequabat amores Igne accensa pari. Dum oleas, umbrasque sequuntur, Alternoque modo voces, et lumina miscent, Exponuntque ex more focos, tenerosque vicissim Corde trahunt gemitus oculis per mutua fixis, Juppiter extemplo Coelum caligine densa Nubilat, et vacuum nimbis circum aethera complet; Saevit tempestas commixta grandine, tellus Horribili reboat tonitru percussa, tremitque Crebrescitque fragor ventis, coelumque lacessit. Quisque suam repetit cryptam, et gurgustia laeta, Et Jovis, igniferique minas formidat olympi. Lustra ferae, et volucres patulae tutamina sylvae Impulse repetunt, camposque, aurasque relinquunt. Cogere tunc Thirenus oves, viridisque ligelli Tecta subire celer, Lyciam praevertere gressu Ingenti satagens studio: at (mirabile dictu) Incassum. Miser, heu miser ille repente momordit Tactus humum de coelo, solvunturque calentes Artus in cineres violentis ignibus usti. At Lycia egregium Juvenem frondente sub antro Expectans, damnansque moras, et sydera saeva, Absentem vocat e specula; vox nulla vocanti Redditur, et miserae geminantur corde dolores. Aaxia quaerit oves, Thirenum quaerit anhela Voce vocans, lustratque vias indagine multa.
Tandem prostratum aspiciens sub tramite curvo Thirenum amissa melioris imagine formae Ter vocat, et mutos cineres perstringit, et umbras Pro socio (infelix) et olentia sulphura captat: Ex illo lacerata comas, pallamque recisa Flere super cinere coepit noctesque, diesque. Imbreque perpetuo latices formavit olentes; Sulphureos latices lenta salsugine mixtos, Queis volucres adstant variae, cantuque perenni Ploranti Nymphae quaerunt solatia. Divum Imperio (5) illa tamen solari nescia puram Perpetua ditat lachrymarum lege scatebram. Hi sacri latices (temere quos tangere palmis Grande nefas) summos pariunt languentibus usus. Abluti diram scabiem, psoramque, lepramque Rite abigunt. Ventres rigido mucore madentes Detergent hausti, expediuntque subinde tenaces Infarctus, renesque luunt, vacuantque saburram, Cunctaque per ventrem illapsi praecordia lustrant, Atque imbecilles impresso robore ventres Firmant, admoti et cachetica membra resolvunt, Extenuantque pedes pallente aedemate molles, Et quot quot pituita parit, seu frigoris atri Vis mala. Acedensis salvete sacerrima Collis Stagna salutiferi fontes salvete, cadentis Naturae columen, (6) miserandae sorti imago. Ipse equidem solvam solemnia vota quotannis Natales celebrans festos, et thure Sabaeo Aras (7) inficiens, positique ex more Liaeo Aetemos latices cytharis ad sydera tollam. Tu vero Adriacae Archiatros celeberrimus Urbis Paeoniae Artis honos, Michael, (8) miseratus acerbum Fatum, virgineos luctus compesce perosus Qui potes, et famam late diffunde medendo.

<<< indice generale